ලිංගිකත්වය 3

Posted by Pradeep Gunarathna at 9:39 PM Read our previous post

ලිංගිකත්වය ගැන ප්‍රදීප්ගේ පිටුවේ ලියපු පෝස්ට් දෙක තමයි තවමත් වැඩිම දෙනෙක් කියවලා තියෙන පෝස්ට් දෙක වෙලා තියෙන්නේ. පළවෙනි පෝස්ට් එකෙන් කතා කලේ ලිංගිකත්වය පිලිබඳ න්‍යායාත්මක කරුණු. දෙවෙනි පෝස්ට් එක වෙන් වුනේ ලිංගික ගැටළු එහෙමත් නැත්නම් අක්‍රමතා ගැන කතා කරන්න. මම පළවෙනි පෝස්ට් එකේ කිව්වා ලිංගික ක්‍රියාව ගැන කතා කරන්නෙ නෑ කියලා. නමුත් ඒ ගැන තියෙන ගැටළු සහ දුර්මතයන් ඉතා විශාල බව හැඟුණු නිසයි මේ පෝස්ට් එක ලියන්න තීරණය කලේ. 

ලිංගිකත්වය සමගම කතා වෙන තවත් වචනයක් තමයි ප්‍රජනනය. ලිංගිකත්වය සහ ප්‍රජනනය කියන වචන වලින් අදහස් වෙන්නේ එකක්ද? දෙකක්ද? මානව ලිංගිකත්වය මගින් අපේක්ෂා කරන්නේ ලිංගික ක්‍රියාවලිය පවත්වා ගැනීම. ප්‍රජනනය කියන්නේ නව සරු ජනිතයින් බිහි කිරීමේ ක්‍රියාවලිය. මේ එකිනෙකට වෙනස් ක්‍රියාවලීන් දෙකක්. ප්‍රජනන කාර්යය සඳහා ලිංගිකත්වය උපයෝගී කරගන්නවා. නමුත් ලිංගිකත්වය ප්‍රජනනය සඳහා පමණක් සීමා වි නැහැ. ලිංගික කාර්යය මිනිසා යොදාගන්නේ තෘප්තිය ලැබීමේ ක්‍රමයක් විදියට. එහිදී උපරිම ලිංගික තෘප්තියක් ලැබීම තමයි හැම කෙනෙක්ගේම බලාපොරොත්තුව.

ලිංගික ක්‍රියාවලිය සඳහා බලපාන සාධක කිහිපයක් තියෙනවා. ඒවා අභ්‍යන්තර සාධක සහ බාහිර සාධක විදියට වර්ග කරන්න පුළුවන්. අභ්‍යන්තර සාධක ගත්තොත් ලිංගික ක්‍රියාවලිය අන්තරාසර්ග පද්ධතිය සහ ස්නායු පද්ධතිය ලිංගික ක්‍රියාවේ වැදගත් කාර්යභාරයක් ඉටු කරනවා. ලිංගික ක්‍රියාව සඳහා අවශ්‍ය වන හෝමෝන ශ්‍රාවය කිරීම අන්තරාසර්ග පද්ධතිය මගින් සිදුකරනවා. නමුත් මිනිසාගේ ප්‍රධානතම ලිංගික අවයවය වන්නේ මොළය. හෝමෝන වලට සාපේක්ෂව ලිංගික කාර්යය සඳහා මිනිසාගේ මනසේ බලපෑම ඉහල අගයක් ගන්නවා. නොදියුණු ජීවීන්ගේ ලිංගික ක්‍රියාවේ වැඩි කාර්යභාරයක් ඉටු කරන්නේ හෝමෝන. 

බාහිර සාධක වශයෙන් සංස්කෘතික ලක්ෂණ සහ සමාජ ආකල්ප ලිංගික ක්‍රියාව සඳහා බලපානවා. උදාහරණයක් විදියට පෙරදිග සංස්කෘතියේ ලිංගිකත්වය පිළිබඳ දරණ ආකල්පයට වඩා බටහිර සංස්කෘතියේ ලිංගිකත්වය පිළිබඳ දරන ආකල්පය වෙනස්. සංස්කෘතික ලක්ෂණ වලත් වෙනස් කම් දැකගන්න පුළුවන්. උදාහරණයක් විදියට ඔබ ඇමෙරිකාවේදී අවිවාහකව තම පෙම්වතා/පෙම්වතිය සමග එකම නිවසක එක්ව ජීවත් වීම එරට වැසියන්ට සරළ සිද්ධියක් වුවත් ඔබ ලංකාවේදී එසේ කිරීමට යාමෙන් දැඩි සමාජ අපවාදයකට ලක් වීමට සිදුවෙනවා.

කුමන සංස්කෘතික හෝ සමාජ වටපිටාවක් තුල වුවද ලිංගික ක්‍රියාවලිය සිදුවන ආකාරය අදියර හතරකට වෙන් කිරීමට පුළුවන්. 

desire - කැමැත්ත.

ලිංගික ක්‍රියාවලියේ පළමු පියවර වන්නේ කැමැත්තයි. මෙම කැමැත්ත ඇතිවීම සඳහා විවිධ හේතු බලපාන්නට පුළුවන්. හෝමෝන වල බලපෑම ඒ අතරින් එකක්. පුරුෂයින්ගේ ලිංගික කැමැත්ත Testosterone හෝමෝනය මගින් උත්තේජනය කරනවා. ඒ වගේම ලිංගික උත්තේජනයක් සපයන කළා නිර්මාණ, භාෂාව, ශබ්ද, පින්තූර ආදිය නිසාත් ලිංගික සම්බන්ධතාවයක් සඳහා කැමැත්ත ඇති වෙන්න පුළුවන්.

arousal - උද්දීපනය

මෙම අදියරේදී ලිංගික ක්‍රියාව සඳහා කායික සූදානමක් ඇති කරනවා. ලිංගේන්ද්‍රියයන්ගේ වෙනස් කම් ඇති වෙනවා. පුරුෂයන්ගේ ශිෂ්ණයේ පවතින corpora cavernosa කියන පටකයට රුධිරය පිරීම නිසා එය දැඩි ශක්තිමත් භාවයට පත් වෙනවා. කාන්තාවන්ගේ යෝනි මාර්ගයේ මෘදු පේෂි පටකය සැහැල්ලු බවට පත් වීම නිසා යෝනි මාර්ගය විවෘත වෙනවා. ඒ වගේම ස්වසන වේගය වැඩි වීම, හෘද ස්පන්දන වේගය වැඩි වීම වාගේ කායික ලක්ෂණ ඇති වෙනවා.

orgasm - සුරතාන්තය

සුරතාන්තය ලිංගික ක්‍රියාවලියේ උපරිම අවස්ථාවයි.

resolution - සිඳී යාම

මෙහිදී ශරීරය සහ ලිංගික අවයව නැවත පෙර තිබූ තත්වයට පත් වෙනවා.

ලිංගික ක්‍රියාවලිය සඳහා කාන්තාවන් සහ පුරුෂයින්ට ගත වෙන කාලය සමාන නැහැ. සාමාන්‍යයෙන් කාන්තාවන්ට ලිංගික උද්දීපනය ලැබීමට පුරුෂයන්ට වඩා වැඩි කාලයක් ගත වෙනවා. ඒ වගේම පුරුෂයකුට එක්වරක් උපරිම තෘප්තිමත් අවස්ථාවට පත් වුනාට පස්සේ නැවත උපරිම තෘප්තිමත් අවස්ථාවක් ලැබීමට යම් කාලයක් ගත විය යුතුයි. නමුත් කාන්තාවකට එකවර උපරිම තෘප්තිමත් අවස්ථා කිහිපයක් ලබන්න පුළුවන්. මේ කරුණු ගැන ලිංගික ක්‍රියාවලියේදී අවධානය යොමු කිරීම වැදගත්. මේ රූප සටහනෙන් මේ බව වඩාත් පැහැදිලි වේවි.

සාර්ථක ලිංගික ජීවිතයක් ගත කිරීම සඳහා බලපාන සාධක කිහිපයක් තියෙනවා.

• Satisfaction - තෘප්තිමත් භාවය. මෙහිදී ලිංගික ක්‍රියාවේ යෙදෙන දෙදෙනාම තෘප්තිමත් භාවයට පත් වීම අපේක්ෂා කරනවා.
• Knowledge - දැනුම ලිංගිකත්වය පිළිබඳ දැනුවත් භාවය
• Experience - පළපුරුද්ද
• Motivation - පෙළඹීම - ලිංගික ක්‍රියාවේ යෙදීම සඳහා දෙදෙනාගේම පෙළඹීමක් සහ කැමැත්තක් තිබිය යුතුයි.
• Communication - සන්නිවේදනය - අන්‍යොන්‍ය වශයෙන් ලිංගික සම්බන්ධතාවය පිළිබඳ සන්නිවේදනය ලැබිම සාර්ථක ලිංගික ජීවිතයක් සඳහා වැදගත් වෙනවා.
• Anxiety - ආතතින්ගෙන් පෙලීම - මෙය ලිංගික තෘප්තිය අඩු වීමට හේතු වෙනවා.
• Physical disorders - කායික රෝගාබාධ වලින් පෙලීම
• Mental disorders - මානසික රෝග වලින් පෙලීම
• Drugs - ඖෂධ - ඇතැම් ඖෂධ නිසා ලිංගික ගැටළු ඇති වෙන්න පුළුවන්
• Smoking, alcohol, substance abuse - මත්ද්‍රව්‍ය  - මත්ද්‍රව්‍ය ලිංගික තෘප්තිය අඩු කිරීමට හේතු වෙනවා.

සාර්ථක ලිංගික ජීවිතයක් ගත කිරීමට බලාපොරොත්තු වන කෙනෙක් මේ කරුණු පිළිබඳ අවධානය යොමු කිරීම වැදගත් වේවි.

ලිංගික ක්‍රියාවලියේදී විවිධ හේතු නිසා විවිධ ගැටළු ඇති වෙන්න පුළුවන්. මේ ගැටළු බොහොමයක් පහසුවෙන් සුව කරන්න පුළුවන්. නමුත් අද පුවත්පත් දැන්වීම් හරහා ලිංගික සම්බන්ධතා වලදී ඇති වන ගැටළු ජාවාරමක් බවට පත්කරගෙන තිබෙනවා. එලෙස ඇති වන ගැටළු කාන්තාවන්ට ඇති වන ගැටළු සහ පුරුෂයින්ට ඇති වන ගැටළු විදියට වර්ග කරන්න පුළුවන්.

• Impaired sexual Interest - ලිංගික සම්බන්ධතා පැවැත්වීමේ කැමැත්ත අඩු වීම හෝ නොමැති වීම. මෙය විවිධ හේතු නිසා ඇති වෙන්න පුළුවන්. දරුවකු බිහි කිරීමෙන් පස්සේ මාස 3-4ක් යනතුරු ඒ මවට ස්වභාවිකවම මේ තත්වය ඇති වෙනවා. ඒ දරු උපතින් පස්සේ ශරීරය යථා තත්වයට පත් වීමට යම් කාලයක් අවශ්‍ය නිසා. ඒ වගේම විෂාදය වගේ මානසික රෝගයකින් පෙළෙන කෙනෙක්ගේ ලිංගික කැමැත්ත අඩු වෙන්න පුළුවන්. එවැනි තවත් හේතු තියෙනවා. මෙය ස්ත්‍රී, පුරුෂ  දෙපිරිසටම ඇතිවිය හැකි ගැටළුවක්.

• Impaired sexual arousal - ලිංගික පිබිදීමක් ලැබීමට නොහැකි වීම. මෙහිදී ලිංගික සම්බන්ධතාවයක් පැවැත්වීමට කැමැත්ත තිබෙන නමුත් ලිංගික පිබිදීමක් ලබන්නට බැහැ. මෙය ස්ත්‍රී, පුරුෂ  දෙපිරිසටම ඇතිවිය හැකි ගැටළුවක්. පුරුෂයන්ගේ මෙම තත්වය ලිංගික අප්‍රාණිකත්වය Erectile dysfunction එහෙමත් නැත්නම් Impotence යනුවෙන් හඳුන්වනවා.

• Orgasmic dysfunction - උපරිම ලිංගික තෘප්තිමත් අවස්ථාවට පත් වීමේ අපහසුතාවය. මෙය ස්ත්‍රී පුරුෂ දෙපිරිසටම ඇති විය හැකි ගැටළුවක්. කාන්තාවකට නම් උපරිම තෘප්තිමත් භාවය ලබාගැනීමට නොහැකි වීම ගැටළුවක් බවට පත් වෙනවා. පුරුෂයින්ගේ මෙම ගැටළුව ආකාර දෙකකට ඇති වෙන්න පුළුවන්. පළමු ආකාරය තමයි Premature ejaculation (ක්ෂණික මෝචනය). මෙහිදී ශුක්‍ර මෝචනය ඉක්මනින් සිදුවෙනවා. අනෙක් ආකාරය තමයි Retarded ejaculation (ශුක්‍ර මෝචනය ප්‍රමාද වීම). මෙහිදී ශුක්‍ර මෝචනය අනවශ්‍ය පරිදි ප්‍රමාද වෙනවා. මෙයින් ක්ෂණික මෝචනය සුලබව දැකගන්න පුළුවන් ගැටළුවක්. බොහෝවිට පුරුෂයාගේ පවතින මේ ගැටළුව නිසා කාන්තාවට උපරිම තෘප්තිමත් භාවය ලබාගැනීමට නොහැකි වෙනවා.

• Vaginismus - මෙය කාන්තාවන්ට පමණක් ඇතිවන රෝගී තත්වයක්. මෙහිදී ලිංගික උද්දීපනය ලැබීමේදී යෝනි මාර්ගයේ සිදුවිය යුතු මාංශපේෂි සැහැල්ලු වීම වෙනුවට මාංශපේෂී දැඩි බවට පත් වීම නිසා යෝනි මාර්ගය වැසී යනවා. එවිට ලිංගික ක්‍රියාවේ යෙදීමට නොහැකි වෙනවා.

• Dyspareunia - ලිංගික සම්බන්ධතාවය වේදනාකාරී වීම. මෙය ස්ත්‍රී පුරුෂ දෙපිරිසටම ඇති විය හැකි ගැටළුවක්. මෙයට අමතරව පුරුෂයන්ට ඇති විය හැකි ගැටළුවක් තමයි Painful ejaculation (ශුක්‍ර මෝචනය වේදනාකාරී වීම).

වඩාත්ම වැදගත් කාරණය තමයි මේ හැම ගැටළුවක්ම සුව කරන්න පුළුවන් කියන එක. ඒ සඳහා ඔබ යායුත්තේ කවුරුන් ළඟටද යන්න පැහැදිලිව තේරුම් ගත යුතු වෙනවා. මෙවැනි ගැටළුවකින් පෙළෙනවා නම් ඔබට කළ හැකි හොඳම දේ තමයි ළඟම ඇති රජයේ රෝහලෙන් වෛද්‍ය උපදෙස් පතන එක. පුවත්පත් දැන්වීම් පළ කරන වෙළඳුන්ට නිකරුණේ මුදල් වැය කරනවාට වඩා එය ඵලදායී වෙනවා. නමුත් ඔබ වෛද්‍යවරයකු හමු වීමට යායුත්තේ ඔබේ ලිංගික ගැටළුව පහත ආකාරයේ එකක් නම් පමණයි. එසේ නොවේ නම් එම ගැටළුව ඉදිරි කාලයේදී මගහැරී යාමට බොහෝ දුරට ඉඩ තිබෙනවා.

• දීර්ඝ කාලයක් තිස්සේ පවතින ගැටළුවක්
• තමන්ට තනිව විසඳාගත නොහැකි ගැටළුවක්
• තම පවුල් සම්බන්ධතාවය බිඳවැටීමේ අවදානමක් ඇති ගැටළුවක්

ලිංගිකත්වය ගැන ලියපු අවසාන පෝස්ට් එක මේ විදියට අවසන් වෙනවා. නමුත් ඉදිරියේදී මේවාට අදාලව වැදගත් යමක් තිබුනොත් ප්‍රදීප්ගේ පිටුවේ ලියවේවි. බ්ලොග් අවකාශයේ මිතුරෝ සමාජ සත්කාර වැඩසටහනට ඔබේ දායකත්වය ලබාදෙන්න කියන ඉල්ලීම නැවතත් කරනවා. එහෙනම් ගිහින් එන්නම්. ජය...!