අන්තිමේදි බලපුවාම අන්දරේලා අපි සේරම....

Posted by Pradeep Gunarathna at 11:51 PM

වේදිකා නාට්‍ය, අපේ බ්ලොග් කරලිය ඇතුලේ ඒ තරම්ම අහල පුරුදු දෙයක් නොවුනත් මම හිතන්නේ ගොඩක් දෙනෙක් කැමතියි නිදහසක් ලැබුනු වෙලාවක නාට්‍යයක් බලන්න යන්න. මමනම් නාට්‍ය පිස්සෙක්. මුලින්ම නාට්‍ය උණ හැදිලා අවුරුදු හත අටක් ගෙවිලා වුනත් අදටත් ඒ උණ ඒ විදියටම තියෙනවා. 

වේදිකා නාට්‍යයක් බැලීම වගේම කිරීමත් හරිම සුන්දර අත්දැකීමක්. සුගතපාල ද සිල්වා මහත්තයා කියපු විදියට නාට්‍යකරුවා 'සොඳුරු ආඥාදායකයෙක්'. ඔහු පැය කීපයකට අපේ ආඥාදායකයා වෙනවා. හැම කළාකරුවෙකුගේම ඇතුලේ සුන්දර මිනිසෙක් ජීවත් වෙනවා. (අද කාලේ සමහරු සුන්දර නෑ වගේ පෙනුනට විවිධ අවශ්‍යතා වෙනුවෙන් ඒ සුන්දරත්වය සඟවාගන ඉන්නවා කියලයි මටනම් හිතෙන්නේ) නාට්‍යකරුවා තමන් දකින ලෝකය බිත්ති තුනකින් වටවුනු රාමුවකට අරන් එනවා. ඔහුගේ ඒ මහන්සියේ ඵලය තමයි හතරවෙනි බිත්තිය හරහා අපි දකින්නේ.

"අපි පොළවෙන් ඉහලට - අඩි තුන හතරක

ඉන්නා විට සැරසීලා.....

ඔතැනට නොපෙනෙන සොඳ - මනහර දසුනකි

නිබඳව මෙතැනට පෙනෙනා...."

කියලා ජයලත් මනෝරත්න මහත්තයා කියන්නේ වේදිකාවේ ඉන්න කලාකරුවාට පෙනෙන ලෝකය ගැනයි. 

නාට්‍යකරණය කොච්චර සුන්දර අත්දැකීමක් වුනත් ඒ ගමනේදි විඳින්න වෙන දුක් ගැහැටනම් එච්චර සුන්දර නෑ. ඒත් හැමදාමත් අපේ කළාකාරයෝ කොහොම හරි තමන්ගේ හදවතේ නලියන දේවල් නාට්‍යයක් බවට පත්කරලා වේදිකාවට ගේනවා. ඒ අතරේ ගොඩක් වෙලාවට තියෙන්නේ අපි හැමෝටම පොදු දේවල්. ඒ නිසාම ඒ නාට්‍ය ගොඩක් රසවත්. මතකනේ සෝමලතා සුබසිංහ නෝනාගේ විකෘති නාට්‍යයේ තියෙන මේ ගීතය,

"විභාගේ විභාගේ... එහෙ බැළුවත් විභාගේ...මෙහේ බැළුවත් විභාගේ

විභාගේ තමයි අපේ අභාගේ....."

කතාව ලියන්න හිතුවේ ලබපු අත්දැකීමක් බෙදාගන්න වුනත් හැඳින්වීම ටිකක් දික්වුනා. හැම අවුරුද්දකම සංස්කෘතික දෙපාර්තමේන්තුවේ නාට්‍ය අනුමණ්ඩලය 'රාජ්‍ය නාට්‍ය උළෙල' පවත්වනවා.(ඒක කෙරුවාම ඇතිද කියලා අහන්න එපා හො‍ඳද) ඉතින් කොහොම කොහොම හරි මේ කාලෙට මගේ ලෙඩෙත් උත්සන්න වෙනවා. අඩුම ගානේ නාට්‍ය දෙක තුනක්වත් බලනවා. මේ වතාවේනම් මාත් එක්ක රංගකලාව හදාරපු අයගේ නාට්‍ය දෙකක්ම තිබුන නිසා ලොකු උනන්දුවකින් තමයි නාට්‍ය බැළුවේ.

මම මුල්ම සහ අවසාන වතාවට රංගකලාව හැදෑරුවේ ජාතික තරුණසේවා සභාවේ ඇතුගල්පුර රංගශිල්ප ශාලිකාවේ. එහෙමත් නැත්නම් කුරුණෑගල නාට්‍ය පාසලේදි. කවදාවත් ඒ ගැන හිතලාවත් නොතිබුන මට නාට්‍ය ඉගෙනගන්න ආසාව ඇතිවුනේ අහම්බෙන්. ඒත් මං ඒ ගැන අදටත් ගොඩක් සතුටු වෙනවා. මගේ ගුරුවරයා සමන් ගාමිණි සර්. 

මේ පාර නාට්‍ය උළෙලට ඉදිරිපත් වුන 'ගුත්තිලය' නාට්‍යයේ 'ගුත්තිල පඬිතුමා' වුනේ අපේ සර්. මාව නාට්‍ය ඉගෙනගන්න ඇදගෙන ගිය ටෝනි පොතේ ගුරු වෙලා හිටියා. අපිත් එක්ක එක බත් මුල ලෙහාගෙන කාපු යාළුවන්ගේ ඉදිරිපත් කිරීම් දකිනකොට ලොකු සතුටක් එක්කම මම ඒ ක්ෂේත්‍රයෙන් අයින් වුන එක ගැන පොඩි දුකකුත් හිතුනා.

ඊයේ කෙටි නාට්‍ය උළෙලේ අන්තිම දවස. ඊයේ තමයි ආනන්ද අයියාගේ 'බල්ලෝ දෙන්නෙක්' වේදිකාගත වුනේ. ජීවන්ති අක්කාව හම්බවුනේ අවුරුදු හතකට පස්සේ. ඒක පුදුමාකාර බැඳීමක්. කොච්චර සමීප යාළුවෝ හිටියත් නාට්‍ය පාසලේ යාළුවෝ ටිකත් එක්ක තියෙන බැදීමටනම් කාටවත් කිට්ටු වෙන්නවත් බැහැ. මම දන්නේ නෑ ඒ ඇයි කියලා.

කොහොම වුනත් මට ඒ දේ ගොඩක්ම තදින් දැනුනා. ලංකාවේ ලොකුම, වැඩිපුරම පහසුකම් තියෙන නෙළුම්පොකුණ ළඟ ඉඳගෙන අපි පරණ ජෝන් ද සිල්වා රඟහලේදි රාජ්‍ය නාට්‍ය උළෙල බැළුවා. 'අපිට කවදාවත් මේකේ නාට්‍යයක් පෙන්නන්න වෙන්නේ නෑ මල්ලියේ' කියලා ගොඩක් නාට්‍යකරුවෝ කිව්වේ ලොකු දුකක් හිතේ හංගගෙන. 

මට නම් හිතෙන්නේ 'උඹලා මේ කරන හරිය හොඳටම ඇති' කියලයි. උඹලා අමාරුවෙන් හදන නාට්‍යය බලන්න අපි කොහොමහරි එනවා. 'නාට්‍ය අතඇරලා ආණ්ඩුවේ රස්සාවට ගිය එක හොඳයි. උඹ ඒකෙන් ගොඩ ගියා' කියලා සමන් සර් කිව්වට 'සර්, ඔය තරම් ලස්සන හිත් මෙහේ හොයන්න අමාරුයි' කියලා මම කිව්වේ නෑ. ඒ ටික හිතේ හංගගෙන සර්ට වැඳලා මම ආපහු ආවා. මම තවමත් ඉන්නේ දුකක්ද සතුටක්ද කියලා හිතාගන්න බැරි ඒ අමුතු හැඟීමත් එක්ක.

සමහරවිට මේ කියපු දේවල් ගොඩක් පුද්ගලිකයි කියලා හිතෙයි. ඒත් මට මේ සිතුවිල්ල ඔයාලත් එක්ක බෙදාගන්න ඕන වුනා. පොරොන්දු වුන විදියට හිස්ටීරියා දෙවෙනි කොටස ලියමින් යන්නේ. හෙට අනිද්දාට දාන්නම්. මේ ලිපියේ මං කියපු දේවල් ගැන මොනවාහරි හිතෙනවානම් පහලින් ලියලා යන්න. මම ගිහින් එන්නම්.

"සුබ සිහින පිරි රාත්‍රියක්...."

මාස දෙකකට පසු..... ආපසු හැරී බැලීමක්....

Posted by Pradeep Gunarathna at 11:27 PM

අදට Pradeep's page (ප්‍රදීප්ගේ පි‍ටුව) ආරම්භ කරලා හරියටම මාස දෙකක් වෙනවා. Anne’s Diaries කියලා අපේ ආයතනයේ වැඩකරන විදේශීය ස්වේච්ඡා සේවිකාවක් ලියන බ්ලොග් එකක් දැකලා තමයි මමත් බ්ලොගර් පැත්තට සේන්දු වුනේ. ඒ 2010 අවුරුද්දේ දවසක. ඒත් ඒ ගතිය එහෙමම නැතිවෙලා ගියා. ඊට පස්සේ 2011 නොවැම්බර් මාසේ 29 වෙනිදා තමයි ආයෙත් ලියන්න පටන්ගත්තේ.

මුලින්ම පටන් ගත්තේ දේවාගේ අඩවියෙන් කොපි කරගත්ත ලිපියකින්. මුලින්ම හොරකමක් කලා කියලා දේවා මට බැන්නේ නෑ. ඒකට හිට්ස් 15ක් විතර වැදිලා තිබුනා. ඒකෙන් ධෙර්යමත් වෙලා තමයි ඒඩ්ස් දිනය ගැන ලිව්වේ. කොහොම කොහොම හරි අද වෙනකොට පෝස්ට් 15ක් දාලා තියෙනවා. Followers ලා 13 දෙනෙක් ඉන්නවා. ඒ ඔක්කෝටමත් වඩා 2200ක් මේ මාස දෙකට ප්‍රදීප්ගේ පි‍ටුව බලලා තියෙනවා.

කොමෙන්ට්ස් 77ක් තිබුනා. ඒ හැම එකක්ම වගේ ධනාත්මක, තව තවත් ලියන්න හිතෙන ඒවා තමයි. ඒවායින් මට තදින්ම දැනුන කීපයක් තමයි මේ...

හුඟක් වටින ලිපියක් , විශේෂයෙන්ම , සෞඛ්‍ය ක්ෂේත්‍රෙයන් පරිබාහිර සාමාන්‍ය ප්‍රජාව පවා යම් තරමකින් හෝ දැනුවත් විය යුතු , නමුත් ඒ සඳහා ප්‍රමාණවත් අවස්ථා නොලැබෙන අපේ රටේ , ඔබ කරනා මේ සේවය ප්‍රසංශනීයයි. - මහේෂ් නිශාන්ත

වටින විස්තරයක් යාළුවේ.... - ඔබ නොදු‍ටු ලොවක්

මාර සැන්ටිමැන්ටල් කතන්දරයක්............ දුක හිතෙනවා මචං - යුනිරුවන්

අදයි ආවෙ. ජූසි කතා නැතිව නියමාකාරයෙන්ම ලිංගිකත්වය ගැන කතාකරල තියනව. - රාජ්

මාර වටිනා පොස්ට් එකක්.සම්ප්‍රදායෙන් පිට ගිහිල්ල හිතන්න පුරුදු වෙනවනම් දියුණුව කියන දේ ළඟ කරගන්න අමාරු නැහැ. - අසරණයා

හරිම වැදගත් ලිපි ටිකක් ප්‍රදීප්.. - රූ...

 මේ විදියට කොමෙන්ට් කරපු, කොමෙන්ට් නොකලත් ඇවිත් ගිය හැමෝටම ගොඩක් ස්තුතියි. මගේ තේමාව තමයි "මම දන්න දේ... මට දැනෙන හැටි". මම දන්න දේවල් සහ මට දැනෙන දේවල් ඉස්සරහටත් ලියන්න බලාපොරොත්තු වෙනවා. මම දන්නවා මේ ලැබුනු දිරිමත් කිරීම් ඉස්සරහටත් ලැබෙනවා කියලා. 

 ආ මග කෙටියි.... යා යුතු මග දුරයි.....

යාළුවනේ, මේ පිටුවේ වෙනස් වෙන්න දෙයක් තියෙනවානම් කියන්න.. මූනුපොතේදි එහෙම මුනගැහුනොත් වචනයක් කතාකරලා යන්න. මම යනවා. හිස්ටීරියා දෙවෙනි කොටසත් අරගෙන ආයෙත් ලගදීම දවසක එන්නම්.

ගෙදර බත් හැලියට වැලි වැටෙනවාද? ඉබේම දොර රෙදි ගිනිගන්නවාද? එසේනම් ඒ හිස්ටීරියාව විය හැකියි....

Posted by Pradeep Gunarathna at 11:28 PM

හිස්ටීරියාව (Hysteria)කියන වචනය මෑත කාලයේ නිතරම අහන්න දකින්න ලැබුනු වචනයක්. ගෙදර දොර රෙදි වලට ඉබේ ගිනි ඇවිලෙන, බත් හැලියට වැලි, අසූචි වගේ දේවල් මිශ්‍ර කරන සිද්ධි කිහිපයක්ම පහුගිය කාලේ පුවත්පත් වල පළ වුනා. ඒ වගේ සිද්ධි ගැන පැහැදිලි කරද්දි නිරන්තරයෙන්ම කියවුන වචනයක් තමයි මේ හිස්ටීරියාව කියන වචනය. සතියක දෙකක විවේකයකට පස්සේ ප්‍රදීප්ගේ පිටුවෙන් මේ ගැන කතාකරන්නයි සූදානම් වෙන්නේ.

හිස්ටීරියාව (Hysteria) කියන්නේ තරමක් පරණ වචනයක්. ජාත්‍යන්තර රෝග පිලිබඳ වර්ගීකරණයේ (International Classification of Diseases – ICD) 10 වන සංස්කරණයෙන් මේ වචනය ඉවත් කරලා ඒ වෙනුවට 'විඝටන ආබාධය' (Dissociative Disorder) කියන වචනය භාවිතා කරනවා.

''The term "hysteria" has not been used in the title for any disorder in Chapter V (F) of ICD-10 because of its many and varied shades of meaning. Instead, "dissociative" has been preferred, to bring together disorders previously termed hysteria, of both dissociative and conversion types.' – (The ICD-10 Classification of Mental and Behavioral Disorders - Page 18)

'විඝටන ආබාධය' කියලා කියන්නේ ශාරීරිකව ඇතිවන රෝගීතත්වයක් නැතිව රෝග ලක්ෂණ පෙන්නුම් කරන රෝගී තත්වයක්. උදාහරණයක් විදියට අතක් අප්‍රාණික වුන කෙනෙක්ගේ ස්නායු වල හෝ වෙනත් කොටස් වල කිසිම ආබාධයක් නැත්නම් අපිට සැක කරන්න පුළුවන් ඔහුට වැලඳිලා තියෙන්නේ විඝටන ආබාධය කියලා. මේ වගේ එකිනෙකට වෙනස් විවිධ ලක්ෂණ විදියට මේ තත්වය ඇතිවෙන්න පුළුවන්.

හිස්ටීරියාව (Hysteria)කියන වචනයේ ඉතිහාසය බොහොම රසවත්. මේ වචනය බිඳිලා ඇවිත් තියෙන්නේ 'හිස්ටරෝස්' කියන ග්‍රීක වචනයෙන්. ග්‍රීක භාෂාවෙන් 'හිස්ටරෝස්' කියන්නේ ගර්භාෂයට. මේ රෝගය හොයාගත්ත මුල් කාලෙදි විශ්වාස කලේ හිස්ටීරියාව හැදෙන්නේ ලිංගිකව තෘප්තිමත් නොවූ කාන්තාවන්ට විතරයි කියලා. මේ කාන්තාවන් ලිංගිකව තෘප්තිමත් නොවන හින්දා ඒ අයගේ ගර්භාෂය ගැලවිලා ශරීරය පුරාම දුවනවා. ඒ දුවන අතරතුර ශරීරයේ එක තැනක ගර්භාෂය ඇලෙනවා. එතකොට ඒ අවයවය ආශ්‍රිතව හිස්ටීරියාව ඇතිවෙනවා.

මනෝවෛද්‍ය විද්‍යාවේ මුල්ම ලිඛිත වාර්තාව ලියවිලා තියෙන්නේ හිස්ටීරියාව සම්බන්ධව. ඒ හිපොක්‍රටීස් විසින්. ඒ තරම් ඈත අතීතයේ පවා මේ රෝගය හඳුනාගෙන ඉඳලා තියෙනවා.  නමුත් හිස්ටීරියාව සම්බන්ධව මුලින්ම විද්‍යාත්මක පැහැදිලි කිරීමක් කරලා තියෙන්නේ සිග්මන් ෆ්‍රොයිඩ්. ඔහු මේ ඉබේ හටගන්න පක්ෂාගාත (paralysis) රෝගය නම් කලේ 'මනෝජනක' (Psychogenic) කියලා.

                                                         හිපොක්‍රටීස්

                                                    සිග්මන් ෆ්‍රොයිඩ්

ෆ්‍රොයිඩ්ගේ පැහැදිලි කිරීමට අනුව අපේ මනස සවිඥ්ඤානය (Conscious mind) සහ අවිඥ්ඥානය (Unconscious mind / Subconscious mind) කියලා කොටස් දෙකකට බෙදන්න පුළුවන්. සවිඥ්ඤානය කියන්නේ මනසේ අපි දන්නා කොටස. අපිට දැනෙන සතුට, දුක වගේ හැඟීම් දැනෙන්නේ මේ කොටසට. ඒ වගේම අපේ මතකයන්, සිතුවිලි ඇතිවෙන්නෙත් මේ කොටසේ. අවිඥ්ඥානය අපිට දැනෙන්නේ නෑ. ඒක ගොඩක් ගැඹුරින් තමයි පිහිටන්නේ. 

අපිට ඇතිවෙන දරාගන්න අමාරු තරමේ ආතතියකදී අපේ සවිඥ්ඤානයේ ඇතිවෙන පීඩනය අවිඥ්ඥානයට තල්ලු කරලා දානවා. ඒකට කියන්නේ 'අවරෝධනය' (Repression) කියලා. අවරෝධනය සංරක්ෂණ ප්‍රයෝගයක් (Defense Mechanism). මේ වගේ සංරක්ෂණ ප්‍රයෝග මාලාවක් සිග්මන් ෆ්‍රොයිඩ්  හඳුන්වලා දීලා තියෙනවා. අවිඥ්ඥානයේ තියෙන දේවල් අපිට දැනෙන්නේ නැති නිසා අර තිබුනු පීඩනය අපිට දැනෙන්නේ නැතිව යනවා. නමුත් පස්සේ කාලෙකදි සංකේතාත්මකව මේ පීඩනය ශාරීරික රෝග ලක්ෂණයක් විදියට මතුවෙනවා. ඒක තමයි හිස්ටීරියාව කියන්නේ.

ICD 10 වර්ගිකරණයේ F44 පරිච්ඡේදය වෙන්වෙලා තියෙන්නේ 'විඝටන ආබාධය' යටතේ වර්ග කරන රෝග වලට. ඒ යටතේ කරුණු 9ක් නම් කරලා තියෙනවා.

F44 Dissociative [conversion] disorders

F44.0 Dissociative amnesia - අමතක වීම

F44.1 Dissociative fugue

F44.2 Dissociative stupor

F44.3 Trance and possession disorders - ආරූඩ වීම හා ආවේශ වීම

F44.4 Dissociative motor disorders

F44.5 Dissociative convulsions - වලිප්පුව

F44.6 Dissociative anesthesia and sensory loss - හිරිවැටීම

F44.7 Mixed dissociative [conversion] disorders

F44.8 other dissociative [conversion] disorders

.80 Ganser's syndrome

.81 Multiple personality disorder

.82 Transient dissociative [conversion] disorders occurring in childhood and adolescence

.88 Other specified dissociative [conversion] disorders

F44.9 Dissociative [conversion] disorder, unspecified

-          (The ICD-10 Classification of Mental and Behavioral Disorders – Page 32-33)

මේ ලක්ෂණ එකින් එක විස්තර කරන්න එක ලිපියකින් අමාරුයි. නමුත් මම හිතනවා මේ කරුණු ටික ප්‍රයෝජනවත් වෙන්න ඇති කියලා. ආයෙත් දවසක තවත් ලිපියකින් හමුවෙමු. අනිවාර්යයෙන්ම දෙවෙනි ලිපිය මීට වඩා රසවත් වේවි. ගිහින් එන්නම්. කියවලා ඉවරවෙලා ඔයාට හිතෙන දේ කොමෙන්ටුවක් විදියට ලියලා යන්න. ඒක මට සතුටක්.

ලිංගිකත්වය (Sexuality) - 02 කොටස - ලිංගික ගැටළු

Posted by Pradeep Gunarathna at 12:37 AM

ප්‍රදීප්ගේ පිටුවේ වැඩිම දෙනෙක් කියවපු ලිංගිකත්වය ලිපියේ දෙවෙනි කොටස ලියනවා කියලා පොරොන්දු වුනානේ. ඔන්න අද ඒ පොරොන්දුව ඉෂ්ට කරන්නයි යන්නේ. පළවෙනි ලිපිය කියෙව්වේ නැත්නම් මෙතනින් කියවන්නකෝ.

අද මම ලිංගිකව ඇතිවන ගැටළු (Sexual Disorders) කීපයක් කතාකරන්නයි උත්සාහ ගන්නේ. හැබැයි වරදවා වටහාගන්න එපා මේ 'ලිංගාශ්‍රිතව බෝවන රෝග' (Sexually Transferred diseases - STD) ගැන කතාකරනවා කියලා. ඒ ගැන ඕනතරම් මාධ්‍ය වල කතාබහ වෙන නිසා මම කතාතරන්නේ නෑ.

අපිට ලිංගික ගැටළු ප්‍රධාන කොටස් තුනක් යටතේ කතාතරන්න පුළුවන්.

01. ලිංගික වස්තු පිලිබඳ අක්‍රමතා (Disorders of sexual object)

02.ලිංගික ක්‍රියාව පිලිබඳ අක්‍රමතා (Disorders of sexual act)

03.ලිංගය හඳුනාගැනීමේ අක්‍රමතා (Disorder of gender identity)

ලිංගික වස්තු පිලිබඳ අක්‍රමතා

මේ යටතේ ලිංගික තෘප්තිය ලැබීම සඳහා භාවිතාකරන වස්තූන්ගේ අක්‍රමතා පිලිබඳව විස්තර කරනවා.

·       ලාංඡන භක්තිය (Fetishism) - ඒ කියන්නේ ලිංගික තෘප්තිය සඳහා අජීවී වස්තූන් (Fetish) භාවිතා කරන එක. සුලභම උදාහරණය තමයි යට ඇඳුම්. ඔයාලා අහලා ඇති යටඇඳුම් (විශේෂයෙන් කාන්තා නේවාසිකාගාර වගේ තැන්වල) නැතිවෙලා කියලා අහන්න ලැබෙනවා. මෙම අක්‍රමතාවය තියෙන අය ඒ වගේ දේවල් කරනවා. ඊට අමතරව වෙනත් දේවල් (උදා: නිළ ඇඳුම්, විවිධ උපකරණ) භාවිතා කරන අයත් ඉන්නවා.

·       පාරවේශනත්වය (Transvestism)  - මේ අක්‍රමතාවයෙන් පෙළෙන අය කරන දේ තමයි විරුද්ධ ලිංගයේ අයගේ ඇඳුම් ඇඳලා ලිංගික තෘප්තියක් ලැබීම. විශේෂයෙන් මේ අයත් කාන්තා යට ඇඳුම් වගේ දේවල් තමන් ඇඳගෙන තෘප්තිමත් වෙනවා.

·       කුමරකාමය (Paedophilia)  - මේ අක්‍රමතාවය තියෙන අය ගැනනම් නිතර අහන්න ලැබෙනවා. ඒ තමයි කුඩා දරුවන්ගෙන් ලිංගික තෘප්තිය ලැබීම. මෙය නීතියට අනුව දරුණු අපරාධයක් විදියටයි ගනන් ගැනෙන්නේ.

·       සත්වකාමය (Zoophilia)  - මේ අක්‍රමතාවය තියෙන අය ලිංගික තෘප්තිය ලබන්නේ සතුන්ගෙන්. සුලභම උදාහරණ තමයි බල්ලන් සහ ගවයන්ගෙන් ලිංගික තෘප්තිය ලැබීම. මෑතකාලයේ මේ වගේ සිද්ධි කීපයක්ම වාර්තා වුනා. මෙයත් නීතියට අනුව දරුණු අපරාධයක්.

·       විපන්‍යකාමය (Necrophilia)  - ඒ තරම්ම සුලභ නැතිවුනත් මේ අක්‍රමතාවය තියෙන අයත් ඉන්නවා. මොවුන් ලිංගික තෘප්තිය ලබන්නේ මෘතදේහ සමග සංසර්ගයේ යෙදීමෙන්. ඉන්දික ෆර්ඩිනැන්ඩු මහත්තයාගේ 'කලම්බෝ කලම්බෝ' නාට්‍යයේ මේ ගැන බොහොම සංවේදී විදියට කතාකරලා තිබුනා.

ලිංගික ක්‍රියාව පිලිබඳ අක්‍රමතා

සාමාන්‍යයෙන් මිනිසුන් විසින් සිදුකරන ලිංගික ක්‍රියාවන්ට වඩා වෙනස් ක්‍රියාවන් වලින් ලිංගික තෘප්තිය ලැබීම මේ යටතේ වර්ග කරලා තියෙනවා.

·       ප්‍රදර්ශනකාමය (Exhibitionism)  - මේ වගේ සිද්ධි ගැනත් අපි අහලා තියෙනවා. තමන්ගේ ලිංගික අවයව (විශේෂයෙන් විරුද්ධ ලිංගිකයන්ට) ප්‍රදර්ශනය කරමින් ලිංගික තෘප්තිය ලැබීම තමයි ප්‍රදර්ශනකාමය කියන නමින් හඳුන්වන්නේ. මේකත් දරුණු අපරාධයක් විදියටයි ගනන් ගැනෙන්නේ.

·       දර්ශනකාමය (Voyeurism)  - මෙවැනි අක්‍රමතාවයක් තියෙන අය ලිංගික තෘප්තිය ලබන්නේ ලිංගික දර්ශන, විරුද්ධ ලිංගිකයන් ඇඳුම් මාරුකරන අවස්ථා ආදිය හොරෙන් බලාගෙන සිටීමෙන්. සමහර පුද්ගලයන් ඒ වගේ ආශාවන් තියෙන අයට තමන්ගේ හෝටල්කාමර, ඇඳුම් වෙළඳසැල් වල Fit-on rooms වගේ තැන්වල කැමරා හයිකරලා, නැත්නම් සිදුරු හදලා දීලා සල්ලි ගන්න අවස්ථා තියෙනවා. ලිංගික චිත්‍රපට වලට ඇබ්බැහිවීමත් දර්ශනකාමය යටතට දාන්න පුළුවන්.

·       පරපීඩාකාමය (Sexual Sadism)  - මේ යටතේ කතාකරන්නේ සහකරු වධයට ලක්කරමින් ලිංගික තෘප්තිය ලැබීම ගැනයි. සුලබව කතානොකලත් මේ තත්වය ගෙවල්වල දකින්න පුළුවන්. සමහර කාන්තාවෝ 'ඒ අපේ මහත්තයාගේ හැටි' කියලා හිතාගෙන මේ තත්වය කාටවත් හෙලිකරන්නේ නෑ.

·       ස්වපීඩාකාමය (Sexual masochism)  - ඒ කියන්නේ තමන්ම වේදනාවට පත්කරගනිමින් ලිංගික තෘප්තිය ලැබීම. මෙය ඒ තරම් දකින්නට ලැබෙන්නේ නෑ. නමුත් කලාතුරකින් මෙවැනි අය ඉන්න පුළුවන්.

ලිංගය හඳුනාගැනීමේ අක්‍රමතා

·       පාරලිංගිකත්වය (Transsexuals)  - මේ අක්‍රමතාවය තියෙන අය හැසිරෙන්නේ, අඳින්නේ පළඳින්නේ, කතාකරන්නේ විරුද්ධ ලිංගයේ අය හැසිරෙන විදියට. මේ කුඩා කාලයේදිම ඇතිවෙන්න පුළුවන් අක්‍රමතාවයක්. මෙවැනි අයට විවිධ සංස්කෘතීන් වල විවිධ මට්ටමේ පිලිගැනීම් ලැබෙනවා.

මේ හැම අක්‍රමතාවයකටම ප්‍රතිකාර ලබාගන්න පුළුවන්. මුලින්ම කරන්න ඕන මේ තත්වය හඳුනාගැනීම. ගොඩක් වෙලාවට ඒ දේ කරන්න පුළුවන් වෙන්නේ තමන්ටම තමයි. මොකද ඒක අතිශයින්ම පෞද්ගලික නිසා. නැත්නම් භාර්යාවට හරි ස්වාමියාට හරි මේ අසාමාන්‍ය හැසිරීම ගැන දැනගන්න ලැබෙන්න පුළුවන්. 

මේ වගේ දෙයක් වුනාම කරන්න තියෙන හොඳම දේ තමයි පිළිගත් වෛද්‍යවරයෙක් හම්බවෙලා ප්‍රතිකාර ලබාගැනීම. ලැජ්ජාවට කියලා ප්‍රතිකාර ලබානොගෙන හිටියොත් ඒක පස්සේ කාලෙක බරපතල තත්වයක් දක්වා වැඩිවෙන්න පුළුවන්.

අනිත් කාරණය තමයි මේ වගේ කෙනෙක් දැක්කොත් ගහලා එලවනවාට වඩා ප්‍රතිකාර වලට යොමුකරනවානම් තමයි වඩා හොඳ. හැබැයි ප්‍රතිකාර කියලා පත්තරේ ලොකු අකුරින් දාන වෙළෙන්දන්ටනම් අහුවෙන්න එපා. පිලිගත් රෝහලකට යන්න. දැන් හැම මහරෝහලකම වගේ මානසික වෛද්‍යවරුන් ඉන්නවා. ඒ අය ඔයාට උදව්කරයි.

කලින් ලිපිය වගේම මේ ලිපියටත් විශේෂඥ මනෝවෛද්‍ය නීල් ප්‍රනාන්දු මහත්මයාගේ දේශනවල සාරය උපකාර වුනා. එතුමාටත් බොහොම පින්. එහෙනම් ගිහින් එන්නම්. ආයෙත් දවසක අළුත් මාතෘකාවක් ගැන කතාකරමු. හෝව්.... හෝව්.... යන්න කලින් කොමෙන්ටුවක් දාන්න අමතක කරන්න එපා.